NN.XX. RINDE HOMENAXE A CASTELAO

Novas Xeracións rindeu homenaxe o sabado en Rianxo ao escritor e artista galego, Afonso Daniel Rodríguez Castelao, precisamente cando se cumpren 126 anos do seu nacemento. O acto, celebrado ante o busto que se erixiu no concello que o viu nacer e ao que asistiron máis de medio centenar de mozos e mozas, contou coa presenza do deputado nacional, Antonio Pérez Ínsua, o senador José Luis Torres Colomer, e a deputada autonómica, Teresa Villaverde, acompañados por Javier Dorado, Juan Francisco López, e Ramón Santos. Na súa intervención, Javier Dorado fixo un recoñecemento especial á figura do escritor e artista galego e asegurou que todos aqueles que traballaron polo noso país desinteresadamente e con vocación pública, como fixeron Castelao e como fixo tamén o recentemente falecido, don Manuel Fraga, sempre serán un exemplo a seguir para Novas Xeracións. Así mesmo, Dorado quixo facer un paralelismo entre dúas figuras tan importantes na historia de Galicia como Castelao e Fraga, e referiuse ao autor galego como o personaxe político, histórico e cultural máis destacado da primeira parte do século XX, mentres que don Manuel o foi na segunda parte da centuria. Por outra banda, recordou que curiosamente o pasado mes de decembro se cumpriron 30 anos da posta en marcha do Estatuto de Autonomía en Galicia e, precisamente Castelao foi o autor do primeiro texto estatutario da comunidade, a pesar de que non chegou a poñerse en funcionamento. Pola súa parte, Ramón Santos afirmou que, coa homenaxe preténdese lembrar a importante contribución deste emblemático escritor á cultura galega, cuxa labor foi determinante para a recuperación da identidade do pobo galego. Tralas intervencións, Santos e Dorado procederon a realizar unha ofrenda floral ante o busto do escritor, mentres os asistentes cantaban o himno galego.